Takimi i parë mes Odës Ekonomike Kosovës dhe asaj të Serbisë për tejkalimin e barrierave administrative në bashkëpunimin ekonomik do të mbahet të enjten, më 30 mars, në Shkup.
E për këtë, kryetari i Odës Ekonomike të Kosovës, Lulzim Rafuna, tha se gjatë takimit të nesërm, do të insistojnë vazhdimisht që produktet kosovare të mos kenë asnjë barrierë për t’u eksportuar në Serbi.
“Ne kemi marrë iniciativë që në kuadër të këtij takimi, t’i ngrisim problemet që i hasin bizneset e Kosovës lidhur me eksportin e mallrave të tyre në Serbi. Ne insistojmë që produktet kosovare të mos kenë asnjë barrierë për t’u eksportuar në Serbi. Kjo është kërkesa jonë që e kemi ngritur në kuadër të forumit të Odave të Ballkanit. U kemi thënë që nëse duam të bëjmë tregti, do të bëjmë tregti pa barriera. Njëjtë si Kosova që nuk vendos asnjë barrierë, as Serbia të mos u vendos bizneseve të Kosovës”, tha Rafuna në emisionin “Ditari”.
Se a do ketë takime tjera mes të dy odave, Rafuna tha se së pari do diskutojnë me zyrtarët e Qeverisë së Kosovës.
“Ne i kemi produktet tona që në Serbi nuk i lejojnë vetëm pse shkruan Made in Kosova. Ne bëjmë presion te Oda Ekonomike e Serbisë që para Qeverisë së Serbisë, t’i nxjerrin këto probleme që i kemi potencuar, pra për t’i eliminuar”, tha tutje Rafuna./teve1.info/.
