Mëngjesin nuk e filloi si çdo ditë tjetër.
Kjo pasi pas reshjeve të shumta të shiut, Fejzullah Gërbeshit mbrëmjen e së mërkurës, uji i hyri brenda mureve të shtëpisë.
Përveç depos, iu dëmtuan edhe mobilet.
“Që 50 vite jetoj në këtë shtëpi kurrë nuk kam pasur problem me ujë as me asgjë tjetër. Kjo kompani që ka bërë kontratë me Komunën e Prishtinës e kanë vendos shaktën një metër e gjysmë edhe as se kanë izolu dhe më ka hyrë uji brenda në shtëpi me kuzhinë, me mobile, me laminat mi ka prishë. Isha në inspektorat, e kam thirr Policinë. Policia më tha shko në Komunë, inspekcioni ma dha me mbush një deklaratë dhe thanë që vimë”, u shpreh ai.
E dëmet që janë shkaktuar, Fejzullah Gërbeshi me social e ka të vështirë t’u bëjë ballë.
“Penzioner 200 euro edhe gruaja 100. Unë kisha bërë apel së pari tek Komuna sepse ata ja kanë dhënë kontratën lloj lloj kompanie. Që mundem mi gjet do pare mi paditë se më duhet me pagu avokat. Kjo puna e padisë shkon 5 – 6 vjet edhe kështu jam mbet”, tha Gërbeshi.
Televizioni ka kontaktuar edhe me drejtorin e inspektoratit në Prishtinë, Florian Dushi.
I njëjti tha se janë informuar për rastin dhe se do të shohin se cilat janë konstatimet nga ky rast.
Ndër të tjera, banorët mbrapa kamerës u ankuan për vështirësitë që po hasin nga punimet tash e disa kohë në rrugën 27 Nëntori në lagjen Vranjevc në Prishtinë.