Në mesin e reshjeve të shiut, të borës dhe temperaturave të ulëta, prishtinasit po përballen edhe me mungesën e ngrohjes.
Ndërkohë që moti i ftohtë ka mbërritur më herët se zakonisht, shumë familje që furnizohen nga ngrohtorja e “Termokosit”, janë në pritje të lëshimit të ngrohjes ani pse ajo sipas paralajmërimeve do të bëhet me 15 tetor.
Mungesa e ngrohjes në këto ditë të ftohta vjeshte ka sjellë pakënaqësi tek qytetaret ne Prishtine.
“Nuk kam biseduar, por e kam parë një lajmërim që kanë paralajmëruar që nëse do të vazhdoj kështu ftoftë do të lëshojnë nxehjen, mirëpo deri tani nuk ka asgjë. Me e lëshuar nxehjen se kur bijnë temperaturat kështu duhet të mendojnë që njerëzit e kanë ftohtë dhe duhet me e lëshuar nxehjen. Me disa nxehëse të vogla, çka me bë”, është shprehur një qytetarë.
Kurse sipas qytetarit Xheladin Xheladini, ngrohja e “ Termokos” është dashur të lëshohet tashmë.
“Termokosi” është dashur të i lëshoj nxehjet që dy javë, me e pru faturën e paguajmë pa problem, pse mos me i lëshuar por me prit datën e caktuar. Unë, e mbaj mend që një herë më 18 maj ka ra borë një herë me i lëshuar nxehmjet i paguajnë njerëzit, po nxehemi me klima po na kushton më shtrenjtë shumë”, ka thënë një qytetarë tjetër.
Edhe kjo qytetare ka pritur që reagimi nga ngrohtorja e qytetit të jetë në kohë.
Ajo madje ka një kërkesë drejtuar këtyre të fundit.
“Jo more, jo kemi prit se është thënë që do lëshohen, por jo, po duhet me rrymë e rrymën po dihet si e kemi në çfarë gjendje. Kërkesa ime drejtuar “Termokosi” është që të jenë me kohën e me situatat e ndryshme të i ngrohin qytetarët, ne se jemi banorë gati pesëdhjetë vite”, është shprehur edhe qytetari tjetër.
Për gjithë këtë situatë të krijuar, nga ngrohtorja e qytetit “ Termokos”, kanë thënë për televizionin se përgatitjet tashmë janë bërë dhe së në raste të vazhdimit të kushteve të tilla ata do reagojnë.
“Ne ishim duke i bërë parapërgatitjet i përshpejtuam për shkak të përkeqësimit të motit. Megjithatë, prapë parashikimet meteorologjike janë se do të kemi një mot më të mirë. Këtyre ditëve do të ketë përmirësim të temperaturave të ajrit, por sidoqoftë ne jemi të gatshëm të fillojmë furnizimin me ngrohje disa ditë para fillimit të sezonit të zakonshëm ngrohës, furnizimin e jashtëzakonshëm ashtu siç edhe njihet me këtë rregullore pra megjithatë në bazë të këtyre parashikimeve të cilat po i përcjellim më vëmendje të shtuar nuk do të ketë nevojë pasi që do të ketë ngritje të temperaturave”, ka thënë Uka.
Ndërsa, nga kjo ndërmarrje kanë treguar se furnizimi me ngrohje për Shërbimin Spitalor Klinik Universitar të Kosovës ka filluar qysh nga e premtja.
“Ndërkohë, ne për nevojat e QKUK-së menjëherë ditën e premte pra kur pati një përkeqësim më të dukshëm të motit kemi aktivizuar ngrohtoren e cila punon vetëm për nevojat e Klinikave të QKUK-së”, ka theksuar tutje Uka.
Ndërsa gjatë ditës edhe disa shkolla në kryeqytet kanë mbajtur mësimin me orar të shkurtuar për shkak të mungesës së ngrohjes.
