Gjykata Kushtetuese e Kosovës e ka shpallur antikushtetuese zgjedhjen e Nenad Rashiqit në postin e nënkryetarit të Kuvendit, pas ankesës së paraqitur nga Lista Serbe lidhur me seancën e mbajtur më 10 tetor.
Sipas aktgjykimit, u shkel Kushtetuta dhe Rregullorja e Kuvendit, pasi Rashiqi nuk u propozua nga shumica e deputetëve të komunitetit serb.
Deputeti i zgjedhur i Lëvizjes Vetëvendosje, Vigan Qorrolli, këtë aktgjykim e cilëson si të mangët dhe problematik për rendin demokratik të vendit.
“Ne kemi bërë një kritikë publike për këtë aktgjykim, i cili ne mendojmë se ka prekur ekuilibrin demokratik të Kosovës, në disa aspekte… një aktgjykim jashtëzakonisht voluminoz për nga përmbajtja, por i mangët nga forma”, tha ai në emisionin “Info Nata” në Tëvë1.
Ai ka theksuar se, sipas LVV-së, përfaqësimi i serbëve në institucionet e Kosovës nuk mund t’i besohet Listës Serbe, duke e lidhur këtë subjekt politik me sulmin terrorist në Banjskë.
“Ne besojmë fuqishëm jo vetëm politikisht, por edhe kombtarisht që një përfaqësues i Listës Serbe, klika e së cilës ka bërë sulmin terrorist në Banjska, nuk mund ta përfaqësojë vullnetin e serbëve, pavarësisht legjitimit të plotë që ata mund ta kenë marrë në votën e 28 dhjetorit”, tha ai.
Qorrolli ka kritikuar gjithashtu faktin që, sipas tij, Gjykata Kushtetuese ka lejuar në mënyrë të pakufizuar propozimin e nëntë kandidatëve nga Lista Serbe, pa pasur ndryshime në rrethana normative, faktike apo në përbërjen e vetë Gjykatës.
“Fakti që Gjykata Kushtetuese, pa ndryshimin e rrethanave normative dhe faktike, por edhe pa ndryshimin e një përbërje, e lejon në mënyrë të pakufizuar propozimin e të nëntë kandidatëve të Listës Serbe – ne mendojmë që ky është një arbitraritet kushtetues dhe ndërhyrje flagrante në autonominë e Kuvendit. Sepse, fuqia politike”, deklaroi ai. /teve1.info/
