Ministria e Industrisë, Ndërmarrësisë dhe Tregtisë (MINT) ka publikuar çmimet tavan të derivateve për ditën e sotme në Kosovë.
Sipas njoftimit, çmimi maksimal i lejuar për naftën është 1.91 euro për litër, ndërsa për benzinën 1.47 euro. Krahasuar me një ditë më parë, kur nafta ishte 1.89 euro, vërehet një rritje e lehtë e çmimit.
Rritja e çmimeve lidhet me zhvillimet në tregjet ndërkombëtare, të cilat po vazhdojnë të jenë të paqëndrueshme. Shqetësimet kryesore lidhen me situatën gjeopolitike, përfshirë respektimin e armëpushimit mes SHBA-së dhe Iranit, si dhe funksionalizimin e Ngushticës së Hormuzit, një ndër rrugët më të rëndësishme për transportin e naftës.
Pas një rënieje të përkohshme të mërkurën, çmimi i naftës së papërpunuar Brent ka shënuar sërish rritje, duke u ngritur me 2.7% të enjten dhe duke arritur në 97.23 dollarë për fuçi.
