Lagjia “Arbëria” në Prishtinë, ishte pistë e Policisë së Kosovës të shtunën.
Kjo pasi që pikërisht aty dyshohet që humbi jetën një punëtorë dhe një tjetër u lëndua, porse ndodhet jashtë rrezikut për jetë.
Rastin e ka konfirmuar edhe zëdhënësja e Policisë së Kosovës, Flora Ahmeti.
“Rreth orës 17:00 kemi pranuar informatën se dy persona janë lënduar derisa ishin duke punuar, në rrugën Faruk Rama në Prishtinë. Si pasojë e lëndimeve, njëri nga personat ka ndërruar jetë. Vdekja e tij është konstatuar nga ekipi i mjekëve emergjent në vendin e ngjarjes, ndërkohë që personi tjetër i lënduar është dërguar për tretman mjekësor. Aktualisht policia në koordinim me inspektorët e punës dhe prokurorinë, kanë nisur hetimin e rrethanave që karakterizojnë rastin”.
Për të kuptuar gjendje e puntorit tjetër, televizioni ka tentuar të marr një përgjigje edhe nga QKUK, por të njejtit kanë thënë se nuk kanë pranar mbrëmë ndonjë rast të tillë.
Ndërsa, nga Prokuroria Themelore në Prishtinë thonë se i kanë marrë të gjitha veprimet e nevojshme për të hetuar rastin.
“Lidhur me pyetjen tuaj ju njoftojme, se prokurori kujdestar se bashku me institucionet relevante, kanë dalur në vendin e ngjarjes, rasti është inicuar “Asgjesim, dëmtim ose heqje e paisive mbrojtëse, rrezikim i sigurisë në vendin e punës” nga neni 358 të Kodit Penal të Republikës së Kosovës. Prokurori i shtetit është duke i ndërmarr të gjitha masat dhe veprimet e nevojshme hetimore për zbardhjen e plot tëçështjes në fjalë”, konfirmoi zëdhënësja e Prokurorisë në Prishtinë, Kaltrina Shala.
Kurse, detaje për rastin ka dhënë Riza Plakolli nga Inspektoriati i Punës.
“Sipas gjetjeve preliminare, aksidenti ka ndodhur gjatë procesit të shkarkimit të dy shaktave të betonit me dimensione 2 x 2 x 1.2 m, moment kur kamioni është rrokullisur dhe njëra nga shaktat ka rënë mbi punëtorin Bashkim Nitaj, duke i shkaktuar fatalitetin. Në këtë fazë, Inspektorati i Punës është duke vazhduar hetimet mbi shkaqet e aksidentit dhe për çdo zhvillim tjetër që mund të komunikohet do tju informojmë juve dhe publikun”.
I ndjeri ishte nga fshati Drenc i Deçanit, kryetai i kësaj komune, Bashkim Ramosaj e kujtuar atë si njeri punëtor teksa ka thënë që Nitaj ishte pjesë e Ushtrisë Çlirimtare të Kosovës, dhe koontriuboi për lirinë e atdheut.
Kronikë e realizuar nga gazetarja, Jona Kelmendi.
