Përkundër që mësimi ka dhjetë ditë që ka nisur, Nexhmije Hajdari nuk e ka rinisur si zakonisht punën.
Ajo bashkë me koleget e saj në shkollën e mesme të agrobiznesit dhe teknologjisë, “Abdyl Frashëri”, kanë vendosur të protestojnë.
Shkak është bërë paga prej 390 eurosh.
Kompania përgjegjëse për mirëmbajtjen e shkollës, ka vendosur të mos e respektoj vendimin qeveritar, dhe t’i paguaj punëtorët nën pagën minimale.
“Për ne është e rëndë, por shyqyr nuk varet vetëm nga ne familja se punojnë edhe tjerët nga pak, por është shumë rëndë se me 390 euro nuk mundesh me ia dal asesei. Kërkesa jonë dhe dëshira është që pagën të e kemi qysh e kanë punëtorët që janë me të shtetit edhe ne private me pas. Të e kemi pagën qysh është miratua ligji edhe ne jemi të kënaqur me ta, jo jo, ne duhet me vazhdua grevën”, ka deklaruar punëtorja teknike, Nexhmije Hajdari.
Në gjendje të njëjtë sikurse këta punëtor, televizioni ka kuptuar se janë edhe punonjësit teknik në shkollën ekonomike në kryeqytet, “Hoxhë Kadri Prishtina”.
Për këtë çështje, TËVË1 ka kontaktuar me komunën e Prishtinës, mirëpo nuk ka pranuar përgjigje.
Në gjendje të njëjtë proteste ishin edhe në shkollat fillore të Prishtinës.
Megjithatë, kryetari i sindikatës së punëtorëve të sektorit privat, Jusuf Azemi, tregon se problemi i tyre është zgjidhur.
“Përderisa kërkesa tek shkollat fillore është përmbush po flas për muajin gusht, e tek shkollat e mesme për muajin gusht nuk është përmbush. Kompania ju ka vendos nga 391 euro ashtu siç i ka vendos Komuna e Prishtinës, kompanive e pastaj këta i kanë transferu tek shkollat e mesme, dhe meqë nuk është përmbush kriteri për pagën tek shkollat e mesme ato janë në grevë. Kam informacion që shumë shpejt ndoshta mund të jetë në pyetje edhe ora nuk po flas me ditë, që mund të nënshkruhet ky memorandum nga kryetari i komunës rritja e pagave në 500 euro”, u shpreh kryetari i sindikatës së puntorëve në sektorin privat, Jusuf Azemi.
Në këtë fillim vit shkollor, gjendje e rëndë me mbeturinat u pa në disa prej shkollave të kryeqytetit.
