Inspektorati Qendror i Punës ka ndaluar punimet në dy objekte ndërtimi, një në komunën e Prishtinës dhe një tjetër në komunën e Vitisë.
Sipas njoftimit të Inspektoratit, vendimet për ndalimin e punimeve janë marrë pas inspektimeve në terren, ku janë konstatuar parregullsi dhe mungesë e masave të nevojshme për Sigurinë dhe Shëndetin në Punë (SSHP).
“Punimet në këto dy objekte do të mbeten të ndaluara deri në eliminimin e parregullsive të evidentuara dhe krijimin e kushteve të sigurta për punë”, thuhet në njoftim.
Inspektorati Qendror i Punës u ka bërë thirrje të gjithë punëdhënësve që të respektojnë legjislacionin në fuqi dhe të marrin masat e nevojshme për garantimin e sigurisë dhe shëndetit të punëtorëve në vendin e punës./teve1.info/
