Paris Saint-Germain ka shpallur rezultate rekord financiare për sezonin 2024-2025, duke arritur të ardhura totale prej 837 milionë eurosh, shifra më e lartë në historinë e klubit.
Kjo tejkalon rekordin e mëparshëm prej 806 milionë eurosh, siç u konfirmua në raportin financiar zyrtar të klubit francez.
Nga këto, 367 milionë euro kanë ardhur nga të ardhurat komerciale, ndërsa 175 milionë euro nga ndeshjet në “Parc des Princes”, ku biletat janë shitur plotësisht në 170 ndeshje radhazi, një tjetër tregues i fuqisë ekonomike dhe popullaritetit të klubit.
Sezoni 2024/2025 ka qenë një nga më të lavdishmit në historinë e PSG-së, që arriti më në fund fitoren e parë në UEFA Champions League, duke mposhtur Interin në finale.
Përveç trofeut kontinental, skuadra pariziene fitoi edhe Ligue 1, Kupën e Francës dhe Trofé des Champions (Superkupën e Francës), ndërsa u ndal vetëm në finalen e Botërorit të Klubeve.
Në komunikatën zyrtare, klubi theksoi se “ky rezultat tregon maturimin e projektit që prej mbërritjes së aksionarit kryesor QSI dhe konfirmon stabilitetin e modelit ekonomik që e rendit PSG-në ndër klubet më të suksesshme në botë.”
Qatar Sports Investments mori kontrollin e klubit në vitin 2011.
Në raport janë përfshirë edhe të ardhurat nga faza çerekfinale e Botërorit të Klubeve, ndërsa fazat pasuese do të reflektohen në bilancin e ardhshëm.
Pavarësisht rekordeve të të ardhurave, PSG ka regjistruar një humbje vjetore, shifra e së cilës nuk është bërë publike.
Vitin e kaluar, deficiti ishte rreth 60 milionë euro.
