Freskinë nga i nxehti u nis të gjente në pishinën e Gërmisë.
Por, Shyqyri Thaçi më të mbërritur në hyrje ju desh të kthej nga kishte ardhur.
Kjo meqë Inspektorati Sanitar i Ministrisë së Shëndetësisë e mbylli përkohësisht këtë pishinë mbi dyshimin se uji nuk përmbush standardet e duhura higjiene-sanitare.
E se kushtet nuk janë të mira e thotë edhe vet Thaçi.
“Kushtet nuk janë të mira kjo pishinë duhet me qenë kryeqendër pishinë i madh Gërmia, pisha, gjelbërimi duhet me qenë pishinë nivel. Në fillim në anën e djathë një zhveshtore është katastrofë nuk e mbajnë mirë aty duhet më shku më larë diku me i ndërruar rrobat se këtu është katastrofë. Edhe uji këtu ka diçka, nuk e di a bijën prej gjetheve u mundofshin me disa rrjete disa djem me shty ajo e ndotë”, shprehet Shyqyri Thaçi – qytetar.
Instituti Kombëtar i Shëndetësisë Publike thekson që edhe më 23 korrik janë marrë mostrat e ujit, dhe të njëjtat do të dalin të premten.
“Rezultatet e këtyre mostrave te lëshuara me 22 korrik 2025, treguan se parametrat mikrobiologjikë nuk plotësuan standardet për ujin e pishinës. Inspektorati Sanitar i Ministrisë së Shëndetësisë ka bërë vizitë në këtë pishinë, në të njëjtën ditë. Më 23 korrik 2025, janë marrë mostra të përsëritura dhe rezultatet përfundimtare pritet të jenë të gatshme ditën e premte, me 25 korrik 2025”, thuhet nga IKSHPK.
E nga ndërmarrja Sport Marketing thonë se primare është shëndeti i pushuesve.
“Si ndërmarrje publike, jemi të përkushtuar në respektimin e plotë të udhëzimeve dhe rekomandimeve të IKSHPK-së dhe të çdo institucioni përgjegjës. Shëndeti publik ka qenë dhe mbetet prioriteti ynë kryesor”, thuhet nga kjo ndërmarrje.
Kurse, Komuna e Prishtinës ka shprehur shqetësimin për këtë gjendje.
“Kryeqyteti shpreh shqetësimin lidhur me alarmin e panevojshëm të krijuar nga deklaratat publike të parakohshme dhe të pambështetura në rezultate përfundimtare. Sipas vetë IKSHPK-së, mostrat e dyta janë ende në proces të analizës laboratorike dhe rezultatet përfundimtare pritet të publikohen nesër. Çdo komunikim publik para përfundimit të këtyre analizave rrezikon të dezinformojë qytetarët dhe të krijojë konfuzitet”, thuhet nga komuna.
E nga opozita në kryeqytet, fajtor për gjithë këtë situatë e lënë Komunën e Prishtinës dhe ndërmarrjen që e ka nën menaxhimin pishinën e Gërmisë.
“Qytetarët e Prishtinës mund të infektohet në pishinë e Gërmisë, e kjo është papërgjegjësi e Komunës së Prishtinës e ndërmarrjes që merret me pishinën dhe komplet ekzekutivit të Komunës së Prishtinës në krye me Përparim Ramën. Për çudi sot edhe kryetari Rama ka me shpallë kandidaturën në këtë pishinë ku uji është i kontaminuar siç është e kontaminuar edhe qeverisja lokale 4- vjeçare e kryetarit Rama”, thotë Besart Krasniqi – asamblist i Vetëvendosjes.
Pishina e Gërmisë është hapur me tetë korrik e që nga ajo datë sot është hera e dytë që i është ndaluar veprimtaria përkohësisht.
