Drejtuesi politik i koalicionit Euroatlantik, Lulzim Basha në një intervistë për emisionin “Këndi i Debatit” në Tëvë1 ka treguar arsyen e përkrahjes së tij ndaj Strukturës së Posaçme Anti-Korrupsion (SPAK).
Basha ka thënë se ai e mbështet SPAK-un pasi sipas tij vetëm përmes mbështetjes për luftën ndaj korrupsionit mund të avancohen synimet drejt integrimit evropian të Shqipërisë.
Ai ka shtuar se koalicioni Euroatlantik është i vetmi që ka dërguar në kuvend paketë ligjore për ndihmë ndaj SPAK-ut.
“Struktura e Posaçme Anti-Korrupsion (SPAK) është një investim strategjik euroatlantik prandaj dhe koalicioni Euroatlantik ka qenë dhe është në mbështetje me vepra dhe jo me fjalë ndaj SPAK-ut. Të vetmit që kemi një vit e gjysmë që kemi dërguar paketën për ndihmën ndaj SPAK-ut dhe këta bëjnë sikur nuk e shohin e nuk e fusin as në rend të ditës ta diskutojnë e jo më ta votojnë. Quhemi koalicioni Euroatlantik dhe mbështesim SPAK-un se vetëm përmes mbështetjes për luftën ndaj korrupsionit, vetëm përmes mbështetjes për SPAK-un ne mund të avancojmë synimet tona drejt integrimit evropian të vendit. Nuk ka rrugë tjetër, nuk ka rrugë të shkurtër dhe nuk ka rrugë të fshehtë, rruga e vetme është t’i japim SPAK-ut gjithë fuqinë që e meriton për t’i shkuar deri në fund luftës kundër korrupsionit”, ka deklaruar Basha.
