Punonjësit shëndetësor të Qendrës Kryesorë të Mjekësisë Familjare në Prishtinë kanë mbajtur protestë 15 minutshe në shenj pakënaqësie për mosekzekutimin e pagave për muajin gusht nga shteti.
Kryetari i Shoqatës Sindikale, Sherif Makolli, tha se indinjata, revolta e cila është krijuar nga punonjësit është për mosekzekutimin e pagave.
“Ne dje gjithë ditën jemi mundu ta gjejmë arsyen pse nuk janë ekzekutuar pagat, nuk kemi marrë përgjigje. Ministria e Financave e gjuan topin tek Komuna, Komuna tek Ministria e Financave, ne jemi të revoltuar, punëtorët ju e dini në çfarë gjendje janë, revolta është e jashtëzakonshme”, tha Makolli.
Sipas Makolit, ata nuk e dinë arsyen e mospagesës së punonjësve shëndetësor për muajin gusht por shtoi se institucionet shtetërore po luajnë me dinjitetin e tyre.
“Nuk e dimë arsyen por ne e konsiderojmë papërgjegjësi të madhe dhe janë duke luajtur me dinjitetin e punëtorit shëndetësor. Ju e dini në çfarë gjendje kemi punuar në pandemi, çfarë kontributi kemi dhënë kurse sot luajnë me neve, këto paga sa të vogla që janë prapë luajnë me dinjitetin e punëtorit”, tha Makolli.
Ai tha se puna është duke vazhduar dhe se për protestë janë shfrytëzuar minutat e pauzës por shtoi se do të veprojnë varësisht nga gjendja që do të jetë me pagesa.
