Ministrja e Mjedisit Fitore Pacolli dhe deputeti i Lidhjes Demokratike të Kosovës (LDK) Arben Gashi kanë diskutuar në seancën e Kuvendit të Kosovës për gjendjen e krijuar nga zjarri në deponinë e mbeturinave në Pejë, ku pati mospajtime lidhur me përgjegjësinë institucionale për menaxhimin e situatës.
Pacolli tha se shqetësimi për gjendjen në deponi është i drejtë, por theksoi se përgjegjësia kryesore për mirëmbajtjen dhe menaxhimin e saj i takon Komunës së Pejës.
“Shqetësimi është plotësisht e drejtë. Është e domosdoshme të sqarohen kompetencat ligjore dhe përgjegjësia institucionale. Deponia është nën menaxhimin e drejtpërdrejtë të komunës së Pejës dhe për aq kohë që kjo deponi mbetet nën administrimin komunal përgjegjësia primare për mirëmbajtje, keqmenaxhimin bien mbi komunën e Pejës. As ministria as kompania nuk kanë kompetenca. Jemi në kontakt me kompaninë”, tha ajo.
Ndaj kësaj deklarate reagoi deputeti i LDK-së, Arben Gashi, i cili tha se në këtë situatë nuk ka rëndësi se cili institucion është përgjegjës për deponinë, por mbrojtja e jetës dhe shëndetit të qytetarëve.
Ai kërkoi ndërhyrje urgjente dhe ndarjen e një fondi emergjent për ndaljen e zjarrit, duke theksuar se përgjegjësia për gjendjen e krijuar mund të trajtohet më vonë nga organet e drejtësisë.
“Mesa di unë deponia është ndërmarrje publike rajonale, ku mblidhen edhe mbeturina të Pejës, Istogut, Deçanit, Klinës, po nuk ka rëndësi, jeta e qytetarëve është në rrezik. Nuk po më intereson hiç a është e komunës, a është e qeverisë apo e kujt, me rëndësi është jeta e njerëzve. Fond emergjent, çka doni bëni, aty duhet të ndalet zjarri, kush e ka fajin shkoni nëpër gjykata, le të shkon në burg kushdo që ka faj, nuk jam duke e trajtuar politikisht, nuk jam duke e sulmuar, po kërkoj mbrojtjen e njerëzve”, tha Gashi.
Në përgjigje të tij, ministrja Pacolli tha se gjendja aktuale është pasojë e keqmenaxhimit shumëvjeçar dhe se problemet e grumbulluara ndër vite nuk mund të zgjidhen brenda një periudhe të shkurtër.
Ajo kritikoi Gashin se nuk e kishte ngritur më herët këtë shqetësim, ndërsa përgjegjësinë për situatën ia atribuoi udhëheqjes komunale të Pejës.
“Sikur ta kishe nisur këtë diskutim vite më përpara, kur ka pasur alarm se po keqmenaxhohet deponia, atëherë nuk e ke ngritur zërin. Keqmenaxhimi disavjeçar të ka sjell këtu sot, ne nuk mundemi me riparua brenda një periudhe të shkurtër. Po duhesh ta adresosh kujt i takon, komuna duhet të merr përgjegjësi për këtë gjendje. Është kryetari i partisë së juaj që ka udhëhequr me komunën e Pejës tash e sa vite”, tha Pacolli.
Ndryshe, deponia e mbeturinave në Sferkë të Pejës është përballur prej muajsh me zjarre dhe ndotje, duke shkaktuar shqetësime te banorët.









