Kryeministri i Shqipërisë, Edi Rama ka reaguar sërish lidhur me polemikat mbi idenë e ndërtimit të një projekti turistik në Zvërnec, duke përdorur një ton ironik dhe kritik ndaj debatit brenda vendit.
Në një postim në rrjetet sociale, Rama ka shpërndarë një artikull nga një media greke që raporton për investime të mëdha nga marka ndërkombëtare hotelierie në Mykonos, si Four Seasons, Fouquet’s dhe MGallery.
“Greqia vazhdon “të shitet tek të huajt” me sukses, kurse ne na i kanë futur xixat nga të katër anët që të zihemi mesveti edhe për 1+1 që bëjnë 2, e të vijmë vërdallë në udhëkryq kur konkurenca vazhdon vrapin për më shumë investime të huaja…”, shkruan Rama.
Kryeministri thekson se mbështetja e investimeve të huaja është thelbësore për zhvillimin ekonomik dhe turistik.
“Po si mund t’i mbyllim ne rrugët për kapitalet e mëdha, tani që ato po nisin të vijnë në Shqipëri pas tërë mundit të madh që kemi bërë për të ardhur në këtë pikë?! Po tërë bota e zhvillon turizmin dhe ekonominë duke u matur me sa investime të huaja tërheq, ndërsa ne do të matemi me sa rezistojmë kundër tyre?! Kjo është një ftesë për vetëprapakthim kolektiv që Shqipëria nuk mund, nuk duhet dhe nuk ka për ta pranuar”, thekson Rama.
Artikulli i publikuar nga media greke nënvizon se Mykonos mbetet një destinacion premium në Mesdhe, pavarësisht tensioneve gjeopolitike dhe sfidave të turizmit.
Investitorë të mëdhenj po hapin hotele të reja me pesë yje dhe po zgjerohen linjat ajrore ndërkombëtare, duke përfshirë lidhje nga Roma, Londra, Abu Dhabi dhe Dubai. Një resort i ri, me vlerë mbi 100 milionë euro dhe i lidhur me investitorin egjiptian Naguib Sawiris, pritet të hapet në maj të vitit 2027.
Postimi i plotë:
Greqia vazhdon “të shitet tek të huajt” me sukses, kurse ne na i kanë futur xixat nga të katër anët që të zihemi mesveti edhe për 1+1 që bëjnë 2, e të vijmë vërdallë në udhëkryq kur konkurenca vazhdon vrapin për më shumë investime të huaja…
Po si mund t’i mbyllim ne rrugët për kapitalet e mëdha, tani që ato po nisin të vijnë në shqipëri pas tërë mundit të madh që kemi bërë për të ardhur në këtë pikë?!
Po tërë bota e zhvillon turizmin dhe ekonominë duke u matur me sa investime të huaja tërheq, ndërsa ne do të matemi me sa rezistojmë kundër tyre?!
kjo është një ftesë për vetëprapakthim kolektiv që shqipëria nuk mund, nuk duhet dhe nuk ka për ta pranuar
Ja përmbajtja e artikullit:
Marka të mëdha ndërkombëtare të hotelerisë po investojnë në Mykonos, ku hotele të reja me pesë yje nga Four Seasons, Fouquet’s dhe MGallery janë planifikuar të hapen së shpejti.
Pavarësisht tensioneve gjeopolitike dhe një sezoni sfidues për turizmin, Mykonos vazhdon të mbetet një nga destinacionet premium më të rëndësishme në Mesdhe.
Kompanitë ajrore po rrisin numrin e vendeve të disponueshme në fluturimet ndërkombëtare për sezonin 2026, me një rritje prej 7.1% të kapacitetit hyrës.
Po shtohen gjithashtu linja të reja ajrore nga Roma, Londra, Abu Dhabi dhe Dubai, duke forcuar më tej lidhjet ndërkombëtare të Mykonosit.
Një resort i ri me pesë yje, me vlerë mbi 100 milionë euro dhe i lidhur me investitorin egjiptian Naguib Saëiris, pritet të hapë dyert në maj të vitit 2027.
