Vendimi për shtrenjtimin e çmimit të energjisë elektrike prej 16.1 % që ndodhi të premten alarmoi qytetarët.
Qindra prej tyre protestuan për këtë vendim të dielën.
Mirëpo, protesta përfundimisht nuk do të jetë forma e vetme përmes së cilës do të kundërshtohet rritja.
Organizatorët kanë angazhuar avokatin Ardian Bajraktari, i cili po e përgatit një padi kundër këtij vendimi të ZRRE-së.
“Vlerësojmë që procesi i marrjes së vendimit nga ana e ZRRE-së është shoqëruara me shkelje ligjore si dhe ligjet për rregullatorin e energjisë ashtu edhe të ligjet për procedurën e përgjithshme administrative. Megjithatë jemi ende në pritje të publikimit të vendimit nga ana e ZRR-së, veprim që është dashur tashmë të ndodh, në mënyrë që të analizojmë të njëjtin e të finalizohet padia sa më parë”, shprehet avokati Bajraktari
Si fillim, kërkesë kryesore në padi do të jetë shtyrja e ekzekutimit të vendimit për rritjen e çmimit të energjisë elektrike, deri në një vendim të Gjykatës.
“Me rastin e paraqitjes së padisë do ta paraqesim edhe propozimin për shtyrjen e ekzekutimit të vendimit . Për faktin se dëmet që i behën palëve në procedurë por edhe qytetarëve janë të mëdha dhe në mënyrë zingjirore. Po ashtu shtyrja e një vendimi të tillë nuk është kundër interesat publik, prandaj vlerësojmë që do ta bindim gjykatën që edhe vendimi për shtyrjen të procedohet tutje për të konstatuar paligjshmërinë e këtij procesi të Zyrës së Rregullatorit të Energjisë”, thotë avokati.
E para zyrave të ZRRE-së, do të protestohet përsëri këtë të shtunë.
“Janë dy kërkesa kryesore të cilat i kemi në këtë kohë, pra të pezullohet ky vendim i dëmshëm dhe të shkarkohet bordi i ZRRE-së. Këto janë dy kërkesat të cilat ne do t’i kemi vazhdimisht ndaj institucioneve tona të cilat po shpresojmë që do të konstituohen këto ditë. Në mënyrë që po e ritheksojmë se jeta e qytetarëve të behët e përballueshme”, thotë Luan Hasnaj nga grupi “Asnjë cent më shumë”
Deri tash janë mbajtur disa protesta në kundërshtim të shtrenjtimit të energjisë elektrike.
