Dita e njëmbëdhjetë e protestës kundër investimit të planifikuar në Zvërnec të Vlorës u paralajmërua si protestë kombëtare nga grupi koordinues që e lidhi me 10 qershorin, ditën e Lidhjes Shqiptare të Prizrenit.
Protestuesit u mblodhën fillimisht në sheshin “Skënderbej” si çdoherë nga këto ditë me thirrjet e zakonshme për dorëheqjen e Kryeministrit Edi Rama, largimin e Berishës nga drejtimi i opozitës, hetimin e pasurive të politikanëve dhe kundër shitjes së pasurive kombëtare.
Pas grumbullimit në shesh, protestuesit marshuan në bulevardin “Dëshmorët e Kombit” për t’u rigrumbulluar përpara Kryeministrisë.
Qytetarët vijojnë me të njëjtat thirrje për dorëheqjen e Kryeministrit dhe drejtuesit të opozitës, sikundër dhe me pankarta që sjellin në vëmendje ruajtjen e natyrës dhe problematikat e tjera që i kanë mbledhur së bashku.
“Shqipëria e shqiptarëve, vdekje tradhtarëve”, “Shqipëri e re”, “Nesër më shumë”, “Pa rini nuk ka Shqipëri” dhe të tjera thirrje u dëgjuan në kor nga protestuesit ndërsa ata marshuan në bulevard.
Pas grumbullimit përpara Kryeministrisë, u luajt himni kombëtar, raporton ATSH.
Një nga aktivistet e protestës lexoi një historik të shkurtër për Lidhjen Shqiptare të Prizrenit duke thënë se aktualisht vendi ndodhet në të njëjtën situatë sikundër 148 vjet më parë kur i rrezikohej integriteti territorial.
“Sot do e bëjmë Shqipërinë një vend për të jetuar me dinjitet”, tha ajo duke vënë në dukje se lidhja e re është kundër politikës së vjetër.
Gazetari Klevi Muka lëxoi një mesazh të shkrimtarit dhe analistit Kim Mehmeti.
Më pas protestues të ndryshëm dhanë mesazhet e tyre në foltoren e ngritur enkas për protestës sikundër edhe lexuan poezi të Migjenit.
Ata thanë se hallet e Shqipërisë nuk janë ato që dalin në media, por janë fëmijët e saj që po largohen, ekonomia e dobët, shëndetësia, arsimi.
“Ndërsa populli përpiqet të mbijetojë, klasa politike sillet sikur vendi është pronë e saj. Ky është momenti i gjeneratës sonë”, tha një protestues.
Një protestuese ambientaliste tha se gjëja më e mirë që kanë njerëzit është natyra dhe nuk duhet shkatërruar.
“Duhet të respektojmë ligjet e BE-së që të jemi pjesë e saj, të ruajmë këto trashëgimi natyrore, që na ka falur natyra. Shkak i kësaj situate është ligji për zonat e mbrojtura dhe investimeve strategjike të vitit 2024, ato nuk e mbrojnë natyrën tonë, dhe ky është fillimi sepse do vijojnë me të gjitha zonat e tjera”, apeloi ajo.
Gazetari Renaldo Salianji foli para protestuesve si njëri prej tyre për të kundërshtuar padrejtësitë që po i bëhen, siç tha ai, popullit shqiptar.
Gazetari ftoi njerëzit t’i bashkohen edhe më shumë protestës.
Koloneli Krenar Ahmeti foli po ashtu në protestë duke apeluar të rinjtë të mos e lëshojnë sheshin. “Nëse nuk veprojmë tani, edhe kjo gjeneratë e të rinjve do vuajë”, tha ai.
