Një shtetas i Turqisë është arrestuar, pasi që i njëjti dyshohet për rastin e therjes më thikë të 26-vjeçarit nga Prizreni, i cili ka vdekur mbrëmë në Qendrën Klinike Universitare të Kosovës (QKUK).
Lidhur me rastin, Prokuroria Themelore në Prizren do të parashtrojë kërkesë për caktimin e masës së paraburgimit.
Zëdhënësja e kësaj prokurorie, Fitore Mehmeti-Sejrani për Tëvë1 ka thënë se për shkak të ndjeshmërisë së rastit, në këtë fazë nuk mund të japin detaje tjera shtesë.
“Lidhur me rastin është arrestuar i dyshuari me inicialet E.A. (shtetas turk), i cili me urdhër të prokurorit gjendet në ndalim 48 orësh. I njëjti, dyshohet se ka kryer veprën penale ‘Lëndimi i rëndë trupor’ nga neni 186, paragrafi 5 lidhur me paragrafin 3 dhe paragrafin 2 të Kodit Penal të Republikës së Kosovës (KPRK). Për të dyshuarin E.A., prokuroria brenda afatit ligjor, do të parashtroj kërkesë për caktim të masës së paraburgimit. Rasti është duke u hetuar nga prokuroria në bashkëpunim me policinë. Për shkak të ndjeshmërisë së rastit, në këtë fazë nuk mund t’ju japim detaje tjera”, tha zëdhënësja.
Viktima gjatë së shtunës ishte gjetur i shtrirë në tokë e i therur me thikë, në lagjen “Bazhderhane” në Prizren.
Policia ka bërë të ditur se viktima pasi që është sulmuar me thikë nga sulmuesit, të njëjtit e kanë hedhur nga vetura në rrugë e më pas janë larguar në drejtim të panjohur./teve1.info/
