Mëngjesin e së hënës shkroi një status në Facebook.
E një fjali e postimit të Halil Gecit, nxiti reagime të menjëhershme.
Anëtari i parisë “Guxo” përdori fjalën “pushkatim”, kur i komentoi veprimet e fundit të presidentes së Kosovës, Vjosa Osmani.
Krejt kjo, pasi shefja e shtetit nxori dekretin për shpërndarjen e Kuvendit të Kosovës.
Por, pavarësisht se u shpreh në këtë mënyrë, Halil Geci thotë se nuk synonte ta kërcënonte Osmanin.
“Unë sot e kom bo një reagim ndaj deklaratës të fundit të presidentes e ndjeva një obligim edhe qytetar me sqarua qëndrimin tim lidhur me këtë shkrim, unë në këtë shkrim e kom theksua që sipas qëndrimit tim e kam mbështetur dhe në opinionet të disa njohësve të drejtë unë jam mbështet siç janë Enver Hasani, Mazllum Baraliu me ngutin e Presidentes e ka bo një shkelje që e paraqet gati si një grusht prandaj unë si familje e kam mbrojt edhe kushtetutën e Kaqanikut, e e mbroj edhe këtë kushtetutë por nuk kom bo unë asnjë të keqe që e parasheh që unë kam nxitë urrejtje ndaj kurrkujt, unë e kam bo një prononcim hipotetik kur kamë thënë që kushtetuta e Kosovës nuk parasheh dënime kapitale për dënimet kushtetuese”, ka thënë Geci.
Geci shton se ish-shefja e tij tek “Guxo” u ngut me dekretin
“Reagimin e presidentes e shoh të nxituar ashtu si u nxitu për shpërndarje të parlamentit edhe mu më vjen keq po ajo është një prej juristeve më të mira që i ka Kosova e din ku e ka shkel kushtetutën edhe e din që unë nuk kom thonë asgjë në lidhje më këtë edhe sja kom bo asnjë të keqe”,u shpreh tutje Geci.
Por, i gjithë ky sqarim i Gecit, erdhi vetëm pas reagimit të Presidencës së Kosovës.
“Kur në debat politik përdoret fjala “pushkatim”, kjo nuk ka të bëjë me kritikë apo opinion, por me një gjuhë të rrezikshme që nxit urrejtje dhe normalizon dhunën politike. Kosova nuk është dhe nuk duhet të jetë kurrë vend ku aktivistë politikë vetëshpallen gjykatës dhe shpallin dënime me jetë për figura të zgjedhura nga qytetarët. Mentaliteti që prodhon gjuha e tillë është pikërisht mentaliteti që për dekada e ka mbajtur peng debatin publik me etiketime, shpifje dhe linçime”, thuhet në njoftimin e Presidencës.
Ndërkohë, në orët e pasdites u bë e ditur se edhe Prokuroria Speciale ka iniciuar rast penal për kërcënimet ndaj presidentes së vendit Vjosa Osmani.
Rasti është iniciuar si vepër penale “Dhunë ndaj përfaqësuesve të lartë të Republikës së Kosovës.”
