Parmes një njoftimi për medie, Prokuroria Special ka njoftuar se Pantiq ishte në gjendje të keqe shëndetësore derisa sipas komunikatës, për shkak të rrethanave të krijuara nuk ishte mundësia të bartet në qendër shëndetësore.
“Edhe pse kundër të pandehurit ka ekzistuar vendim për caktim të paraburgimit, për shkak të rrethanave tashmë të njohura, i njëjti asnjëherë nuk u dërgua në paraburgim ashtu siç kërkohet me ligj.
Pas vizitave të ekipeve mjekësore të Eulex-it, të cilët kanë konstatuar gjendje jo të mirë shëndetësore për të pandehurin, ata kanë rekomanduar trajtim në një qendër spitalore, megjithatë as ky rekomandim nuk u realizua.
Prokuroria Speciale e Republikës së Kosovës, duke u bazuar në aspektin shëndetësor dhe njëkohësisht aspektin human i ka propozuar Gjykatës Themelore në Prishtinë, zëvendësimin e masës së paraburgimit për të pandehurin Pantiq, pasiqë i njëjti ishte në pamundësi t’i gëzoj të drejtat që ju takojnë të paraburgosurve në qendrat e paraburgimit”, thuhet në komunikatë.
Për ndryshimin e masës së paraburgimit nga Gjykata Themelore në Prishtinë reagoi paraprakisht kryeministri Albin Kurti, minitrja e Jashtme, Donika Gërvalla dhe ministrja e Drejtësisë, Albulena Haxhiu.
