Ish-ministri i Mjedisit, Planifikimit Hapësinor dhe Infrastrukturës, Liburn Aliu, është intervistuar për më shumë se tri orë nga Prokuroria Speciale e Kosovës.
Pas përfundimit të intervistimit, Aliu deklaroi për media se ndihet i lehtësuar që më në fund ka pasur mundësinë të japë sqarimet e tij. Ai tha se për dy vjet ka zgjedhur të mos reagojë publikisht ndaj akuzave dhe pretendimeve që janë bërë për periudhën sa ka ushtruar detyrën e ministrit.
Lidhur me këtë rast, Tëvë1 ka dërguar pyetje në Prokurorinë Speciale.
“Lidhur me çështjen për të cilën keni adresuar pyetje, Prokuroria Speciale e Republikës së Kosovës ju njofton se i pandehuri L.A. është intervistuar në kuadër të veprimeve hetimore, lidhur me veprën penale ‘Keqpërdorim i detyrës zyrtare’.Për shkak të fazës së procedurës nuk mund të ndajmë më shumë informacione. Ju faleminderit për mirëkuptim dhe bashkëpunimin”, ka njoftuar zëdhënësja e Prokurorisë Speciale, Arbnora Luta, për Tëvë1.
