Shiriti i sigurisë u vendos në vendin e ngjarjes.
Xhamat e thyer e vetura të dëmtuara, mbetën dëshmi.
Banorët e lagjes së njohur si “Lagjja e Profesorëve” në kryeqytet, u tronditën të premten nga zhurma e shpërthimit nga një mjet eksplodues, që shkaktoi dëme në veturat e parkuara.
E cak i këtij sulmi, dyshohet se ishte një këngëtar nga Prishtina.
Prapa kamerës, ai i tha televizionit se ka dëgjuar një krismë të madhe.
E nga Policia e Kosovës bënë të ditur se nuk u raportua për të lënduar.
“Rreth orës 07:00 është pranuar informata për një shpërthim në rrugën ‘Zekirja Cana’ në Prishtinë. Policia menjëherë ka dalë në vendin e ngjarjes dhe nga informacionet e para bëhet e ditur se si pasojë e shpërthimit nga fragmentet e mjetit shpërthyes gjashtë vetura janë dëmtuar përderisa nuk raportohet për pasoja në njerëz”, thuhet në raportin e policisë.
Nga Prokuroria Themelore e Prishtinës thanë se hetimet kanë filluar.
“Prokurori kujdestar është njoftuar për këtë rast. Me urdhër të njëjtit janë iniciuar hetime, derisa në koordinim me policinë janë duke u ndërmarrë veprime hetimore me qëllim të sqarimit të rrethanave të këtij rasti dhe identifikimit të dyshuarit/ve”, thuhet nga Prokuroria.
Banorët e kësaj lagje nuk pranuan të flasin, e veturat e demoluara mbetën në vendin e ngjarjes.
