Prokuroria Themelore në Prizren, në bashkëpunim me Policinë e Kosovës, ka iniciuar hetime lidhur me dyshimet për falsifikim të rezultateve zgjedhore gjatë procesit të rinumërimit të votave në Qendrën Komunale të Numërimit në Dragash.
Sipas njoftimit zyrtar, hetimet janë iniciuar me vetiniciativë, pas pranimit të informatave publike që ndërlidhen me procesin e rinumërimit të rezultateve të votimit. Veprimet hetimore po zhvillohen nga Prokuroria Themelore në Prizren në bashkëpunim me Policinë e Kosovës – Drejtorinë për Hetimin e Krimeve Ekonomike dhe Korrupsionit në Prizren, me autorizim të Kryeprokurorit Petrit Kryeziu.
Në kuadër të këtij hetimi, janë intervistuar gjithsej pesëdhjetë e një (51) persona të dyshuar. Pas intervistimit, nëntë (9) prej tyre janë ndaluar për 48 orë, me urdhër të Prokurorit të Shtetit, në cilësinë e kryesuesve të komisioneve.
Të ndaluarit dyshohen se kanë kryer veprën penale “Falsifikimi i rezultateve të votimit”, e paraparë nga neni 216 paragrafi 2 i Kodit Penal të Republikës së Kosovës (KPRK).
Prokuroria ka bërë të ditur se, brenda afateve ligjore, do të vlerësojë parashtrimin e kërkesës për caktimin e masave për sigurimin e prezencës së të pandehurve në procedurë.
“Prokuroria Themelore në Prizren dhe Policia e Kosovës mbeten të përkushtuara në mbrojtjen e integritetit të procesit zgjedhor dhe të drejtës së votës së qytetarëve, në luftën kundër veprave penale që cenojnë zgjedhjet e lira dhe demokratike, si dhe në forcimin e sundimit të ligjit dhe vënien para drejtësisë të të gjithë atyre që veprojnë në kundërshtim me ligjin”, thuhet në njoftimin e Prokurorisë Themelore në Prizren, të publikuar në Facebook.
