Prokuroria Themelore në Prizren, përmes Departamentit për Krime të Rënda, ka ngritur aktakuzë ndaj të pandehurit E.R., nën dyshimin se ka kryer veprën penale “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge”.
Sipas aktakuzës, më 24 janar rreth orës 17:50, në fshatin Korishë të Komunës së Prizrenit, i pandehuri dyshohet se ka shpërndarë pa autorizim substanca narkotike me qëllim shitjeje.
“Policia pas marrjes së informatave lidhur me të pandehurin, se ishte duke bërë shitjen dhe shpërndarjen e narkotikëve, vërejnë veturën e markës “Golf 2” e cila futet dhe del nga shtëpia e të pandehurit, të cilën veturë më pas e kontrollojnë, dhe aty arrijnë të gjejnë nën ulësen e shoferit një qese me substancë të dyshuar narkotike të llojit “marihuanë”, dhe më pas rreth orës 20:03 min, gjatë zhvillimit të kontrollit nga ana e policisë, i pandehuri merr një qese te substancës narkotike të cilën e fut nën xhaketë dhe arrin të largohet në pjesën malore afër shtëpisë”, thuhet në komunikatë.
Tutje bëhet e ditur se gjatë kontrollit të shtëpisë së të pandehurit, në dhomën e tij janë gjetur tri pako me substancë narkotike të llojit marihuanë me peshë totale 680.49 gramë.
“Gjatë kontrollit të shtëpisë, në dhomën e të pandehurit janë gjetur një qese me substancë narkotike të llojit “marihuanë” me peshë prej 15.00 gram, një qese me substancë narkotike e llojit “marihuanë” me peshë prej 1.76 gram, një qese plastike ngjyrë e bardhë brenda saj e një qese ngjyre e zezë e mbushur me substancë narkotike e llojit marihuanë me peshë prej 663.73 gram, të cilat kanë një peshë të përgjithshme prej 680.49 gram”, thuhet në komunikatë.
Prokurori i rastit i ka propozuar gjykatës që, pas administrimit të provave dhe mbajtjes së shqyrtimit gjyqësor, i pandehuri të shpallet fajtor dhe të dënohet në përputhje me ligjin në fuqi.
