Një projektligj kundër femicidit, planifikon që ta përgatisë Ministria e Drejtësisë. Një ligj i tillë që do të trajtojë vrasjet e grave vetëm pse janë gra, vlerësohet se do të ketë efekt në vetdijësimin ndaj kësaj dukurie dhe parandalimin e këtyre rasteve.
Vrasjet e fundit të grave tronditën Kosovën.
Në reagimet ndaj këtyre rasteve, shpeshherë u përmend fenomeni i femicidit.
Për këtë çështje, Ministria e Drejtësisë ka filluar punën për hartimin e projektligjit kundër femicidit.
Kjo iniciativë legjislative po vlerësohet si shumë e nevojshme dhe e rëndësishme nga Rrjeti i Grave të Kosovës, që janë pjesë e grupit punues.
“Femicidi për me sqaru, është vrasje e grave vetëm për faktin se ato janë gra. Duke u bazuar në shtetet të cilat e kanë bërë këtë praktikë, pra që e kanë penalizuar femicidin, është parë një rritje e vetdijes tek qytetarët për vrasjen e grave. Është parë si një formë e mirë për të parandaluar vrasjet dhe për të vënë theksin tek vrasjet e grave. Andaj po shpresojmë që kjo nismë do ta ketë këtë efekt, që të rritet vetdija për format e ndryshme të dhunës që përjetojnë gratë, çfarë ka rezulatuar shpeshherë edhe me vrasjen e tyre. Në anën tjetër, edhe një ushtrues potencial i dhunës ta kuptojë që ne si shtet e trajtojmë me seriozitetin dhunën dhe vrasjet e grave”, ka thënë Adelina Berisha nga Rrjeti i Grave të Kosovës.
Mirëpo, ka edhe mendime që Ministria e Drejtësisë do të duhej të fokusohej dikah tjetër.
Pasi në Këshillin për Mbrojtjen e të Drejtave dhe Lirive të Njeriut thonë që kjo çështje po shfrytëzohet për qëllime elektorale.
“Ministria e Drejtësisë do të ishte më mirë të bëntë një infraskturë parandaluese për shtimin e dhunës ndaj femrave, apo ligji të forcohet në zbatimin e tij, se sa të shpikë terme të reja, të cilat kryesisht i bënë duke luajtur me anën emocionale të femrave, për vota dhe për manipulime politike. Domethënë tash për tash s’kemi ligj për femicid dhe asnjë vendim të gjykatës që thotë se dikush është vrarë pse është femër”, u shpreh behxhet Shala nga KMDLNJ.
Grupi punues është përcaktuar përmes një vendimi të ministrisë, i cili pritet që punimet t’i fillojë së shpejti.