Brukseli dhe Uashingtoni nuk e bindën presidentin serb, Aleksandar Vuçiq që ta nënshkruajë marrëveshjen me Kosovën.
Madje, Vuçiq deklaroi se Serbia do punojë për zbatimin e marrëveshjeve deri tek vijat e kuqe, duke kundërshtuar kështu anëtarësimin e Kosovës në Kombet e Bashkuara.
E profesori nga Westminster University, Aidan Hehir, po e kritikon ashpër qasjen e butë të Perëndimit ndaj presidentit serb.
Sipas tij, nëse këto veprime do t’i bënte pala kosovare, reagimi ndërkombëtar do të ishte shumë më ndryshe.
“Kosova ishte pala konstruktive në dialog dhe ishte e gatshme të bënte kompromise shumë të vështira, por problemi qëndron tek Vuçiq. Nuk e di se si kjo mund të quhet një marrëveshje kur palët as e nuk kanë nënshkruar. E para, Vuçiq thotë se nuk do ta nënshkruajë kurrë marrëveshjen, ndërsa e dyta, me tallje thotë se i dhemb krahu i djathtë, dhe këto veprime ai i bënë para Brukselit e Uashingtonit. E tani imagjinoni sikur këto veprime t’i bënte Kryeministri i Kosovës, çfarë reagime kritike do të kishte. Me të vërtetë Perëndimi po tregon dobësi, duke mbajtur anën e Serbisë”, deklaroi Hehir.
Tutje, profesori britanik, thotë se çfarë do lloj forme e asociacionit duhet ta kalojë testin e Gjykatës Kushtetuese të Kosovës.
Hehir, thotë se Beogradi ka synuar që përmes asociacionit të ndërhyjë në punët e brendshme të Kosovës.
“Kryeministri Kurti ka ndryshuar qasje, dhe e ka kuptuar se duhet t’i përmbush obligimet që i ka Qeveria e Kosovës. Megjithatë duhet thënë se qëllimi kryesor i Serbisë që nga fillimi ka qenë që përmes asociacionit të ndikojë në punët e brendshme të Kosovës. Por, siç e kemi parë, Kushtetuta e Kosovës nuk e ka e lejuar që në atë formë të zbatohet asociacioni i komunave me shumicë serbe. Por, po e përsëris, Kosova po tregon gatishmëri për zgjidhje përmes dialogut dhe kjo duhet të vlerësohet”,shtoi ai.
Shefi i diplomacisë evropiane, Josep Borrell, ka deklaruar se Bashkimi Evropian do të monitorojë me kujdes se kush e zbaton marrëveshjen e kush jo.
Kronika e gazetarit Shpat Blakçori.
