Egbo merr drejtimin e Prishtinës
Lëzivje të shumta ka pasur sot tek skuadra e Prishtinës, me kryeqytetasit që së pari njoftuan për përfundimin e bashkëpunimit me Debatik Currin.
Megjithatë, ata pak orë më vonë kanë zyrtarizuar angazhimin e trajnerit të ri, Emanuel Egbo, i cili më parë ishte në krye të Tiranës, skuadër me të cilën u shpall kampion në vitin 2019/20.
Me një postim në Facebook, Prishtina ka bërë të ditur marrëveshjen me Egbo, ndërsa ky i fundit ka thënë edhe fjalët e para në krye të këtij klubi.
“Nuk ishte shumë e vështirë të pranoja ofertën. Pas shpjegimit të planeve dhe objektivave që ka klubi dhe duke qenë tip që i dua sfidat, duke qenë se kam punuar edhe te Tirana, si kulmi i futbollit në Shqipëri, e di që çfarë presioni kanë klubet si Prishtina dhe nuk e pata të vështirë të pranoja punën. Do të jetë ide e mirë të bashkëpunoj me klubin”.
“Objektivat janë të qarta, arritja më e pakët është Evropa, pse jo edhe më lartë, por kjo mund të arrihet vetëm të bashkuar me të gjithë punëtorët e klubit deri te futbollisti më kryesor i skuadrës”.
Drejtori sportiv i klubit, Driton Krasniqi ka falënderuar trajnerin në largim tashmë, Debatik Currin për punën duke thënë se rezultatet ishin motivet që ndanë rrugët me të.
“E falënderojmë trajnerin Curri për punën që ka bërë në ekip. Normalisht, Prishtina gjithmonë kërkon rezultate dhe rezultatet ishin arsyet që u deshtë të ndanim punët me Currin. Normalisht nuk mund të themi që ishte vetëm faji i Currit, por vendimi gjithmonë vendimi bije te trajneri, ky është ligj në futboll”.
“Gjithashtu i uroj mirëseardhje trajnerit të ri, Egbo, me të cilën mendoj se do të bëjë më të mirën që ekipi të arrijë më të mirën për objektivat që kemi. Ekipi është i panjohur për të, por i duhet pak kohë e shkurtër deri sa të arrijë të njoh stafin, lojtarët dhe besoj se do të arrijë të përmbush objektivat e klubit”.
Prishtina në 8 javët e para në Superligën e Kosovës ka marrë një fitore, ndërsa numëron 7 barazime.
