KFOR ka njoftuar se ushtarë nga Luksemburgu, Holanda dhe Belgjika, pjesë e njësisë së Beneluksit të caktuar në Batalionin e Inteligjencës, Mbikëqyrjes dhe Zbulimit (ISRBN), kanë përfunduar misionin e tyre njëvjeçar në Kosovë.
Gjatë qëndrimit në Kosovë, njësia ka përdorur sistemin ajror pa pilot “X-300 Integrator”, duke kontribuar në rritjen e ndërgjegjësimit për situatën dhe efektivitetin operacional në të gjithë rajonin, “duke reflektuar angazhimin e qëndrueshëm të KFOR-it për të siguruar një mjedis të sigurt për të gjithë njerëzit që jetojnë në Kosovë”.
KFOR rithekson se misioni ushtarak vazhdon të zbatojë mandatin e tij – bazuar në Rezolutën 1244 të Këshillit të Sigurimit të OKB-së të vitit 1999 – për të kontribuar në një mjedis të sigurt dhe për të garantuar lirinë e lëvizjes për të gjithë njerëzit në Kosovë, në çdo kohë dhe në mënyrë të paanshme.
“KFOR-i punon në koordinim të ngushtë me Policinë e Kosovës dhe Misionin e Sundimit të Ligjit të Bashkimit Evropian në Kosovë (EULEX), në rolet e tyre përkatëse si reagues të sigurisë”, përfundon njoftimi./teve1.info/
