Sot, do të mbyllet xhiroja e 19-të e Superligës së Kosovës në basketboll, ku do të luhen dy ndeshje dhe të dyja në kryeqytet.
Prej orës 17:00, Sigal Prishtina e pret Pejën në Pallatin e Rinisë dhe Sporteve, në ndeshjen derbi të kësaj xhiroje.
Prishtina është në seri të mirë të rezultateve dhe ndaj Pejës kërkon fitoren e pestë rresht në elitën e basketbollit kosovar.
Prishtina zë vendin e pestë në tabelë me 28 pikë, aq sa i ka edhe Peja që është e treta dhe në këtë përballje futet pas tri fitoreve radhazi.
Ndërkohë, në orën 19:00 në palestrën “1 Tetori” në Prishtinë, Bora e pret Vëllaznimin, në duelin që e mbyll këtë xhiro.
Bora është e parafundit në tabelë me 23 pikë dhe nuk di për fitore në tri ndeshjet e fundit, ndërsa Vëllaznimi kërkon fitoren e tretë rresht dhe aktualisht ka 28 pikë, ku renditet në pozitën e katërt.
Të shtunën, janë zhvilluar dy ndeshjet e para, ku Trepça triumfoi 95:79 në udhëtim te Proton Cable Prizreni kurse Bashkimi e mposhti Golden Eagle Yllin në Suharekë me shifrat 70:60.
Bashkimi prinë në tabelë me 33 pikë të mbledhura, një më shumë se Trepça që renditet e dyta.
