Samiti B40 do të mbahet në Prishtinë në janar të vitit të ardhshëm, ndërsa Kryeqyteti do të udhëheqë rrjetin e qyteteve ballkanike gjatë vitit 2027. Prishtina do të marrë Presidencën e B40 Balkan Cities Network për vitin 2027, duke marrë kështu një tjetër përgjegjësi të rëndësishme në nivel rajonal dhe ndërkombëtar.
Kryeqyteti i Kosovës është ftuar zyrtarisht që të marrë drejtimin e rrjetit nga Kryetari i Zagrebit dhe Presidenti aktual i B40, Tomislav Tomašević. Në kuadër të kësaj përgjegjësie, Samiti B40 pritet të mbahet në Prishtinë në janar të vitit 2027.
Lajmi është bërë i ditur nga Kryetari i Prishtinës, Përparim Rama, i cili e ka cilësuar këtë zhvillim si një vlerësim për rolin në rritje të Kryeqytetit në rajon.
Sipas Ramës, Presidenca e B40 përbën një mundësi që Prishtina të shndërrohet në një platformë të rëndësishme për dialogun, bashkëpunimin dhe zhvillimin ndërmjet qyteteve të Ballkanit.
Në letrën zyrtare për mbështetjen e kandidaturës së Prishtinës, edhe Qyteti i Sarajevës ka shprehur përkrahjen për marrjen e Presidencës nga Kryeqyteti i Kosovës. Mbështetja është argumentuar me lidershipin e Prishtinës dhe orientimin e saj drejt gjithëpërfshirjes, partneritetit dhe vizionit evropian.
Marrja e Presidencës së B40 e vendos Prishtinën në një pozitë të rëndësishme për të koordinuar dhe promovuar bashkëpunimin ndërmjet qyteteve të rajonit gjatë vitit 2027.
“Prishtina nuk do të jetë vetëm pjesë e tavolinës së qyteteve të Ballkanit, do ta udhëheqë atë”, ka deklaruar Rama, duke e cilësuar këtë përgjegjësi si një mundësi të re për forcimin e rolit të Kryeqytetit në rajon.
Rrjeti B40 synon të forcojë bashkëpunimin ndërmjet qyteteve të Ballkanit përmes projekteve të përbashkëta, shkëmbimit të përvojave dhe krijimit të partneriteteve në fusha me interes të përbashkët.
Me Presidencën e vitit 2027, Prishtina pritet të ketë një rol qendror në këtë proces dhe të presë përfaqësuesit e qyteteve pjesëmarrëse në Samitin e ardhshëm B40./teve1.info/
