Pak ditë kanë mbetur deri në rifillimin e gjyqit ndaj katërshes së UÇK-së.
Nga mesi i këtij muaji, gjyqi do të vazhdojë me paraqitjen e çështjes nga ana e ekipeve mbrojtëse.
Ende nuk është bërë publike, lista në tërësi e dëshmitarëve të mbrojtjes që do të dëshmojnë në Hagë.
Megjithatë, për dëshmitarin e koduar “003”, zyrtarë të Shteteve të Bashkuara të Amerikës, kanë vënë disa kushte të veçanta.
Në dokumentin e dorëzuar nga avokati i Thaçit, Luka Misetiç, tregohet se zyrtarët amerikanë kanë kërkuar që vet të jenë prezent gjatë marrjes në pyetje të këtij dëshmitari, si deh kanë kufizuar fushën e pyetjeve që mund t’i bëhen atij.
“Është mirë që zyrtarët amerikanë, kushdo qofshin ata të marrin pjesë në monitorimin e një dëshmie të një dëshmitari. Por këtë e konsideroj si hap pozitiv, të cilin mbrojtja duhet ta kërkojë prezencën amerikane, meqenëse institucionet e Kosovës nuk po themelohen, por edhe pse ishin pesë vjet nuk u bë një monitorim, një dakordim me një organizatë ndërkomëbtare të institohet që gjithsesi që zyrtarët amerikanë, kushdo qofshin ata, ta monitorojnë këtë procedurë penale, pasi që konsiderojmë se janë bërë shkelje të rënda të të drejtave të njeriut”, thotë avokati, Xhevdet Smakiqi.
Kjo prezencë e zyrtarëve amerikanë, vlerësohet se mund të ndikojë pozitivisht në proces.
“Është një numër i amerikanëve që do të dëshmojnë në të mirën tonë, të shtetit tonë e UÇK-së. Ne e kemi pritë shumë mirë dhe unë besoj se do të ketë një ndikim pozitiv, pa e mbajtë anën e asnjë palë. Se i bjen shumë keq që s’e thomë ne, që ata po na mbajnë anën neve, ama jo. Pa e mbajtë anën e asnjë palë, ta shikojnë drejtësinë dhe ta qojnë drejtësinë në vend”, shprehet Hysni Gucati – kryetar i OVL-UÇK-së.
Megjithatë, Specialja thotë se i takon trupit gjykues që të vendosë në lidhje me këtë çështje.
“Këto kushte të kërkuara për dëshminë e dëshmitarit përfshinin që marrja në pyetje të kufizohej në tema të përcaktuara; që dëshmitari të mund të refuzonte t’u përgjigjej pyetjeve për shkak të konfidencialitetit; dhe që përfaqësuesit e qeverisë së Shteteve të Bashkuara të autorizoheshin të ishin të pranishëm gjatë dëshmisë. Mbrojtja gjithashtu informoi Trupin Gjykues se do të paraqiste një kërkesë zyrtare për të kërkuar këto masa. Do të jetë detyrë e Trupit Gjykues të vendosë për çdo kërkesë të tillë”, ka thënë Angela Griep , zëdhënëse e Gjykatës Speciale.
Aktualisht, ende nuk ka një vendim të tillë.
