Presidentja e Republikës së Kosovës, Vjosa Osmani, do të marrë pjesë nesër në Samitin BE–Ballkani Perëndimor, i cili do të mbahet në Bruksel.
Pjesëmarrja e Presidentes Osmani është konfirmuar nga këshilltari i saj për media, Bekim Kupina, i cili ka bërë të ditur se ftesa ka ardhur drejtpërdrejt nga institucionet e Bashkimit Evropian.
“Me ftesë të institucioneve të BE-së, Presidentja Osmani do ta përfaqësojë Kosovën në Samitin BE–Ballkani Perëndimor”, ka deklaruar Kupina për Tëvë1.
Samiti do të kryesohet nga Presidenti i Këshillit Evropian, Antonio Costa. Bashkimi Evropian do të përfaqësohet gjithashtu nga Presidentja e Komisionit Evropian, Ursula von der Leyen, si dhe nga Përfaqësuesja e Lartë e BE-së për Politikë të Jashtme dhe Siguri, Kaja Kallas.
Sipas njoftimit të Bashkimit Evropian, ky samit synon të shërbejë si një platformë për të demonstruar dhe rikonfirmuar forcën e marrëdhënieve strategjike ndërmjet BE-së dhe vendeve të Ballkanit Perëndimor, si dhe përfitimet konkrete që këto marrëdhënie u sjellin qytetarëve të rajonit.
Në përfundim të takimit, pritet të miratohet Deklarata e Samitit BE–Ballkani Perëndimor.
