Presidentja e Kosovës Vjosa Osmani po qëndron në Zvicër për një vizitë shtetërore, e para e këtij lloji.
Në Bernë, Osmani u prit me nderime të larta nga homologia e saj zvicerane Karin Keller- Sutte.
Kjo e fundit, pas mikpritjes, e drejtoi presidenten Osmani drejt turmës së bashkatdhetarëve që po e prisnin atë me shumë entuziazëm.
E gjatë fjalimit të saj, presidentja Osmani falënderoi Zvicrën për mbështetjen që i dha Kosovës në kohët më të vështira, teksa shtoi se është krenare me arritjet e bashkatdhetarëve që jetojnë aty.
“Pikërisht këtu në Zvicër, shumë nga përpjekjet e Kosovës për liri gjetën mbrojtje dhe mbështetje. Kurrë nuk do ta harrojmë këtë. Kosova do të jetë gjithmonë mirënjohëse ndaj Zvicrës dhe ndaj të gjithë zviceranëve. Kosovarët që jetojnë këtu na kanë bërë krenar në shumë fusha”, ka thënë Osmani.
Ndërsa Keller- Sutte tha se Zvicra e mbështet anëtarësimin e Kosovës në Bashkim Evropian.
“Ne e mbështesim këtë ambicie evropiane të Kosovës dhe të gjitha vendeve të Ballkanit Perëndimor”, ka thënë Keller-Sutte.
Presidenca ka bërë të ditur se programi i vizitës do të vazhdojë me ceremoninë shtetërore në Parlamentin e Zvicrës, ku presidentja Osmani do të mbajë një fjalim të posaçëm para përfaqësuesve të institucioneve zvicerane.
Ndërkaq gjatë qëndrimit në Gjenevë, Osmani do ta ketë një takim me mërgatën shqiptare.
