“Sot i kemi në Hagë ata, dashtë Zoti që të jenë sa më shpejt në mesin tonë…
Me këtë lutje po e feston 28 nëntorin.
Si ky i moshuar, edhe shumë të tjerë vizituan Prekazin këtë të premte.
Në ditën e Pavarësisë së Shqipërisë, shumë qytetarë nga vende të ndryshme bënë homazhe te varrezat e familjes heroike Jashari, datë kjo në të cilën shënohet edhe ditëlindja e Adem Jasharit.
Qazim Mehaj thotë se kjo ditë s’duhet të kalojë pa festë.
“Është festë në të cilën duhet të krenohemi të gjithë shqiptarët, kudo që janë, Shqipëri, Kosovë, diasporë që të punojmë që kjo festë të vazhdojë gjithë jetën sa të ketë jetë këtë botë”, thotë ai.
Për të festuar, dikush erdhi edhe nga Tirana.
“Është viti i pestë radhazi që vijmë për t’i bërë homazhe dëshmorëve, dhe me organizimin e këtij evenimenti që bëjnë garë vrapimi. Kanë dhënë gjakun, nuk na kushton asgjë, duhet t’i respektojmë”, u shpreh qytetari nga Tirana.
Mëngjesi i kësaj dite nisi edhe me organizim të vrapimit me 28 kilometra.
Për të nderuar kontributin e familjes Jashari, homazhe bënë edhe Organizatat e dala nga lufta.
“Sot këtu në Prekaz vijnë nga gjitha viset shqiptare për të nderuar heroizmin për të nderuar sakrificën dhe rënien e 59 dëshmorëve me 5/6/7 mars e me theks të veçantë, krahas nderimit dhe respektit, shënojmë edhe këto data të rëndësishme që janë shpalljen e Pavarësisë, Ditën e Flamurit, 1912-ën, por edhe 1443 për herë të parë kur ngritet nga Gjergj Kastrioti Skënderbeu, ditëlindjen e komandantit legjendar, Adem Jashari, daljen publike të UÇK-së”, tha Xhavit Jashari.
Qytetarët ditën e vazhduan duke festuar edhe me këngë e flamuj kombëtar.
