Zyrtari i Shërbimit Korrektues të Kosovës, Granit Sherifi, ka humbur jetën tragjikisht si pasojë e një aksidenti me traktor.
Lajmi është konfirmuar nga zëdhënësja e Policisë së Kosovës, Flora Ahmeti, e cila bëri të ditur se viktima është dërguar për trajtim mjekësor në Qendrën Klinike Universitare të Kosovës (QKUK), por nuk ka arritur t’u mbijetojë plagëve.
“Policia, në koordinim me prokurorinë, po e heton rastin si vdekje të dyshimtë dhe po ndërmerr të gjitha veprimet e nevojshme hetimore për ndriçimin e plotë të rrethanave. Trupi i pajetë i viktimës është dërguar për obduksion”, ka deklaruar Ahmeti.
Ndërkohë, Shërbimi Korrektues i Kosovës ka reaguar përmes një telegrami ngushëllimi, duke shprehur pikëllimin e thellë për humbjen e Sherifit. Në reagim thuhet se ai do të kujtohet si një zyrtar i përkushtuar, koleg i respektuar dhe njeri me vlera të larta njerëzore. /teve1.info/
Vdes tragjikisht zyrtari i Shërbimit Korrektues, Granit Sherifi
