Policia e Kosovës ka njoftuar se ushtrimi i përbashkët i reagimit ndaj krizave, i zhvilluar me Ambasadën e Shteteve të Bashkuara në Prishtinë, është përmbyllur me sukses.
Aktiviteti u zhvillua në zonën e Ambasadës në lagjen “Arbëria” dhe kishte për qëllim testimin e gatishmërisë institucionale, forcimin e kapaciteteve reaguese dhe koordinimin ndërmjet njësive të sigurisë në situata të mundshme emergjente.
Sipas Policisë, gjatë ushtrimit janë angazhuar rreth 790 zyrtarë të profileve të ndryshme, të cilët kanë demonstruar funksionimin e mekanizmave të komunikimit, reagimit të shpejtë dhe bashkëveprimit me ekipet e sigurisë së Ambasadës Amerikane.
Aktiviteti përfshiu përdorimin e mjeteve të specializuara, testimin e procedurave operative dhe simulimin e skenarëve të krizave.
“Falë profesionalizmit të njësive të angazhuara dhe bashkëpunimit të qytetarëve, ushtrimi u realizua pa incidente. Kjo na ka mundësuar të vlerësojmë dhe të përmirësojmë qasjet operacionale të sigurisë”, thuhet në njoftimin e Policisë së Kosovës.
PK ka vlerësuar lartë performancën e të gjitha departamenteve e njësive policore të përfshira, duke falënderuar në veçanti qytetarët dhe pjesëmarrësit në trafik për mirëkuptimin e tyre gjatë riorientimeve dhe ndërprerjeve të përkohshme të qarkullimit në zonën ku po zhvillohej ushtrimi.
Policia ka theksuar se ky ushtrim konfirmon partneritetin e fuqishëm dhe bashkëpunimin e qëndrueshëm ndërmjet institucioneve të sigurisë në Kosovë dhe Ambasadës së Shteteve të Bashkuara, me synim garantimin e një ambienti të sigurt për qytetarët, institucionet dhe stafin diplomatik në vend.
