Policia e Kosovës ka bërë të ditur se ndeshja e futbollit ndërmjet Kosovës dhe Izraelit e luajtur në Prishtinë, në aspektin e sigurisë ka kaluar e qetë dhe pa incidente
Para kësaj ndeshje, Policia në bazë një plani operativ ka shtuar masat e sigurisë.
“Ndeshja sportive, e luajtur mbrëmë, në mes të kombëtares së Kosovës dhe Izraelit për kualifikime në EURO2024, vlerësuar në aspektin e sigurisë, ka kaluar e qetë dhe pa ndonjë incident që ka cenuar sigurinë publike dhe mbarëvajtjen e ndeshjes sportive. Policia e Kosovës, në bashkëpunim dhe koordinim me FFK-në dhe akterët relevantë, ashtu siç e ka bërë të ditur me kohë, ka bërë planifikimet e saja operacionale për menaxhimin dhe mbarëvajtjen sa më të mirë të kësaj ndeshje sportive, duke u kujdesur për ofrimin e sigurisë që nga ardhja e kombëtares së Izraelit në Republikën e Kosovës e deri në kthimin e saj për në Izrael”, thuhet në komunikatën e PK-së.
Para nisjes së këtij takimi të zhvilluar të dielën në stadiumin “Fadil Vokrri” në Prishtinë, janë shoqëruar në polici dy persona, të cilët sipas PK-së, kishin thyer rregullat për hyrje në stadium.
Kosova mposhti Izraelin me rezultat 1:0 në ndeshjen e vlefshme për Kampionatin Evropian të futbollit i cili vitin e ardhshëm do të mbahet në Gjermani./teve1.info/
