Gjatë ditës së shtunë, Policia e Kosovës ka ndërhyrë në disa raste të veçanta të të shtënave me armë zjarri dhe armë me gaz gjatë ahengjeve familjare në komuna të ndryshme të vendit.
Në të gjitha rastet, janë konfiskuar armë dhe gëzhoja, ndërsa të dyshuarit janë liruar në procedurë të rregullt, me urdhër të prokurorëve përkatës.
Në Prishtinë, një i dyshuar është arrestuar pasi që gjatë një ahengu familjar kishte shtënë me armë zjarri. Në vendin e ngjarjes u konfiskuan 8 gëzhoja dhe një revole me gaz.
Dy persona u arrestuan në fshatin Poklek i Ri në Drenas, pasi njëri prej tyre kishte shtënë në ajër pas një ahengu. Policia konfiskoi një armë me gaz Zoraki 917-T (cal. 9mm) dhe një karikator pa fishekë.
Po në Drenas, pas raportimeve për të shtëna, një i dyshuar u vetëdorëzua në stacion policor, duke pranuar se kishte shtënë me armë me gaz Zoraki 917-T (cal. 9mm). Arma u konfiskua.
Kurse, në Cërnicë të Gjilanit, pas disa të shtënave të dëgjuara gjatë patrullimit, policia identifikoi dy persona të dyshuar. U sekuestruan dy pistoleta, 5 fishekë dhe 20 gëzhoja cal. 9mm.
Të gjithë të dyshuarit janë liruar përkohësisht, ndërsa rastet janë duke u trajtuar në procedurë të rregullt ligjore në bashkëpunim me prokuroritë përkatëse.
