Ministria për Punë të Brendshme e Maqedonisë së Veriut ka njoftuar për arrestimin e tre personave gjatë një proteste të mbajtur sot në Shkup.
Sipas njoftimit, rreth orës 17:45, punonjësit policorë nga SPB Shkup kanë arrestuar tre shtetas të Maqedonisë së Veriut, nën dyshimet për prishje të rendit dhe qetësisë publike.
Arrestimi është kryer para objektit të Ministrisë së Drejtësisë, ku ishte planifikuar përfundimi i marshit protestues.
Ndërkohë, studentë shqiptarë nga Shqipëria që morën pjesë në protestë janë vendosur në ambientet e Ambasadës së Shqipëria në Shkup.
Protesta është organizuar me thirrje dhe pankarta për mundësimin e mbajtjes së provimit të jurisprudencës në gjuhën shqipe, përveç maqedonishtes.
Protestuesit kanë marshuar nga Ura e Gurit drejt Ministrisë së Drejtësisë, duke kërkuar zbatimin e Ligjit për përdorimin e gjuhëve dhe respektimin e të drejtave të tyre gjuhësore.
