Një ngjarje e rëndë ka ndodhur sot rreth orës 15:40 në ambientet e Gjykatës së Apelit të Juridiksionit të Përgjithshëm në Tiranë, ku një person ka qëlluar për vdekje me armë zjarri gjyqtarin Astrit Kalaja gjatë zhvillimit të një seance gjyqësore.
Burimet zyrtare të policisë informojnë se:
“Rreth orës 15:40, në ambientet e Gjykatës së Apelit të Juridiksionit të Përgjithshëm Tiranë, gjatë një procesi gjyqësor, dyshohet se shtetasi E. Sh., 30 vjeç (palë në proces) ka qëlluar me armë zjarri drejt gjyqtarit, shtetasit A. K., dhe shtetasve R. K., 65 vjeç dhe E. K., 45 vjeç, atë e bir (pala tjetër në proces).
Si pasojë ka humbur jetën shtetasi A. K. dhe janë plagosur shtetasit R. K. dhe E. K, të cilët janë jashtë rrezikut për jetën.
Shërbimet e Policisë me marrjen e njoftimit kanë shkuar menjëherë në vendngjarje dhe kanë bërë të mundur kapjen dhe shoqërimin në ambientet e DVP Tiranë, të autorit të dyshuar, shtetasin E. Sh., si dhe kanë sekuestruar armën e krimit.
Grupi hetimor vijon veprimet nën drejtimin e Prokurorisë të Juridiksionit të Përgjithshëm Tiranë.”
Autoritetet konfirmojnë se autori i dyshuar, E. Sh., është arrestuar menjëherë pas ngjarjes dhe është dërguar në Drejtorinë Vendore të Policisë së Tiranës, ndërsa arma e përdorur në krim është sekuestruar.
Autoritetet pritet të japin më shumë detaje në orët në vijim.
