Policia e Shqipërisë u ka bërë apel të gjithë drejtuesve të automjeteve që të tregojnë kujdes të shtuar dhe të ulin shpejtësinë në segmentin Tuneli i Kalimashit–Morinë, për shkak të prezencës së mjegullës në Rrugën e Kombit.
Përmes një njoftimi për mediat, Policia Rrugore thekson se shikueshmëria në këtë segment është e reduktuar dhe kërkon nga shoferët që të respektojnë rregullat e qarkullimit dhe udhëzimet e punonjësve të policisë.
Ndërkohë, shërbimet e Njësisë së Sigurisë Rrugore, në bashkëpunim me Policinë Rrugore të DVP Kukës, ndodhen në terren për monitorimin e qarkullimit dhe për t’u ardhur në ndihmë drejtuesve të automjeteve.
Policia gjithashtu ka njoftuar se në rast nevoje për ndihmë, qytetarët mund të telefonojnë në numrin emergjent 129.
“Për shkak të prezencës së mjegullës në Rrugën e Kombit, segmenti Tuneli i Kalimashit–Morinë, ku shikueshmëria është e reduktuar, Policia Rrugore apelon për të gjithë drejtuesit e automjeteve që të tregojnë kujdes të shtuar, të ulin shpejtësinë dhe të zbatojnë udhëzimet e punonjësve të Policisë. Shërbimet e Policisë së Njësisë për Sigurisë Rrugore në bashkëpunim me Policinë Rrugore të DVP Kukës, ndodhen në terren për monitorimin e qarkullimit dhe për t’ju ardhur në ndihmë drejtuesve të automjeteve. Në rast nevoje për ndihmë, telefononi në numrin 129”, thuhet në njoftim.
