Policia e Kosovës, përmes Drejtorisë Rajonale në Ferizaj, ka lëshuar një apel të fortë ndaj qytetarëve që të tregojnë kujdes të shtuar për të mos shkaktuar zjarre gjatë ditëve me temperatura të larta dhe kushte klimatike të thata.
Sipas njoftimit zyrtar, gjatë javës së fundit janë raportuar disa raste të zjarreve në komunat e Ferizajt, Shtimes dhe Hanit të Elezit, por fatmirësisht aktualisht nuk ka asnjë vatër aktive në rajon.
“Policia Rajonale e Ferizajt ka ndërmarrë të gjitha masat e nevojshme dhe ka angazhuar personel për menaxhimin e rasteve të zjarreve në tërë territorin e rajonit”, thuhet në njoftim.
Policia bën thirrje për shmangien e djegies së mbeturinave, hapësirave fushore apo pyjore, duke theksuar se pasojat mund të jenë të rënda për jetën, mjedisin dhe pronën.
Pa kompromis ndaj zjarrvënësve
Policia ka paralajmëruar se ndaj çdo personi që shkakton zjarr, qoftë me qëllim apo nga pakujdesia, do të merren masa ligjore të rrepta dhe do të iniciohen procedura penale në përputhje me ligjin.
“Do të veprohet pa kompromis ndaj çdo zjarrvënieje të qëllimshme ose për shkak të neglizhencës”, thekson policia.
Thirrje për bashkëpunim
Policia u bën thirrje qytetarëve që të raportojnë menjëherë çdo zjarrvënie apo person të dyshuar, përmes:
Numrave të telefonit:
192
0290 / 326 – 250
0290 / 322 – 406
Aplikacionit digjital “Lajmëro Policinë”
“Të gjitha informatat do të trajtohen me konfidencialitet të plotë. Së bashku mund ta mbrojmë ambientin, shëndetin dhe sigurinë tonë”, përfundon apeli i Policisë së Ferizajt.
