Në mesin e këtyre protestuesve në Prishtinë ka edhe nxënës.
Për pjesëmarrjen e tyre, në rrjetet sociale u bënë edhe thirrje që nxënësit ta lënë mësimin e t’i bashkohen protestës.
Për këtë ka reaguar Ministria e Arsimit.
“MASh rikujton se asnjë nxënës nuk mund të detyrohet apo t’i bëhet presion për pjesëmarrje në protesta apo tubime publike. Duke qenë se bëhet fjalë për nxënës, shumica e të cilëve janë nën moshën 18-vjeçare, institucionet arsimore kanë përgjegjësi të veçantë për mbrojtjen e tyre, respektimin e të drejtave të tyre dhe garantimin e zhvillimit të rregullt të procesit mësimor. Orari mësimor duhet të respektohet dhe nxënësit nuk duhet të organizohen apo largohen nga procesi mësimor për asnjë qëllim”, thuhet nga MASh.
E nga shkolla “Gjin Gazulli” në Prishtinë thonë se ka pasur vetëm tentativa individuale të nxënësve për t’iu bashkuar protestës.
“Nuk është e vërtet që ka pas një organizim prej shkollave, ka pas ndoshta organizime individuale prej nxënësve që janë mundu me u grumbullua me shku në protestë e pastaj e kemi hetu që po ndonjë me u organizua i kemi lajmërua prindërit edhe është qetësua situata ndoshta ka pas pjesëmarrje të nxënësve në mënyrë individuale por jo në mënyrë të organizuar”, thotë Bujar Gjocaj-drejtor i shkollës.
Gjocaj tha se pas situatës së djeshme, prindërit janë njoftuar që nxënësit të qëndrojnë larg protestës dhe mësimi të vazhdojë normalisht.
“Ne dje kemi qenë të pa përgatitur e ndërsa sot i kemi lajmru prindërit që nxënësit me qenë sa më larg protestës dhe mësimi duhet me u zhvillu në mënyrë normale”, tha ai.
Pjesëmarrjen e nxënësve në protesta e sheh si problematike, edhe njohësi i animist, Ismet Potera.
“Pa marr parasysh kush e bën këtë ftesë është tejet e rrezikshme, mas pari është kundërligjore sepse aty nuk humb vetëm një orë, dhe kerkush nuk merr përgjegjësi se çka mundet të ndodh me ata fëmijë të cilët janë në moshën e adoleshencës edhe çfarë energjie kanë edhe mund të ndodhin gjëra të pa këndshme të cilat vërtet pastaj nuk e di ku na qojnë. Pastaj nga mjetet piroteknike krijohet ajo panika dhe fëmijët mund të pësojnë sepse nuk kanë aq fuqi sa të ikin sikurse të rriturit”, shprehet ai.
Ndërkaq Ministria u ka bërë thirrje drejtorive komunale të arsimit dhe institucioneve edukativo-arsimore që të ndërmarrin masat e nevojshme.
