Drejtori i së ashtuquajturës Zyre për Kosovë në Qeverinë e Serbisë, Petar Petkoviq, ka thënë se kryeministri i Kosovës, Albin Kurti, nuk po planifiko ta themelojë Asociacionin, prandaj po shkakton incidente në mbarë Kosovën.
Petkoviq së bashku me kryetarin e Listës Serbe, Goran Rakiq, kanë mbajtur konferencë për media, duke reaguar për arrestimin e 36-vjeçarit, M.B., i cili dyshohet për djegien e veturave në veri dhe sulmin ndaj zyrtarëve policorë.
“Është e qartë se me sjelljet provokuese dhe veprimet e dhunshme të Policisë së Kosovës, Prishtina dhe Albin Kurti duan të kërcënojnë paqen dhe të nëpërkëmbin dialogun. Albin Kurti po përpiqet të gjejë hapësirë për t’i shpëtuar AKS-së, prandaj i duhen krizat, sepse atëherë nuk ka dialog”, tha Petkoviq, raporton Kosovo Online.
Ndërsa, Rakiq ka ripërsëritur deklaratën e tij, duke thënë se nëse nuk lirohet i arrestuari serb, serbët do të protestojnë.
“Serbët do të mblidhen e do të protestojnë nëse Milan Bozhoviq nuk lirohet”, ka thënë ai.
“Do të doja të vija këtu sot për të folur për AKS-në dhe që ajo do të formohet dhe që populli serb në Kosovë e M. do të ndihet më i sigurt. Fatkeqësisht, lëvizjet e fundit të Prishtinës kanë sjellë vetëm indinjatë, revolotë dhe pakënaqësi të madhe të popullit serb”, tha tutje Rakiq.
I dyshuari serb, është arrestuar dje pasi që i njëjti dyshohej për përfshirje në rastin e sulmit me armë zjarri ndaj njësisë së PK-së, me ç’rast si pasojë ishin plagosur dy zyrtarë policorë nga arma e zjarrit.
Ndaj 36-vjeçarit, është ngritur kallëzim penal për veprat penale “Pjesëmarrje ose organizimi i grupit kriminal të organizuar”, “Vrasje në tentativë”, “Shkaktim i rrezikut të përgjithshëm” dhe “Sulm ndaj personit zyrtar gjatë kryerjes së detyrës zyrtare”. /teve1.info/
