Kryetari i Prishtinës, Përparim Rama, gjatë tubimit përmbyllës të mandatit të tij, vuri në pah “zhvillimin e vazhdueshëm të kryeqytetit dhe ndikimin e tij në skenën ndërkombëtare”.
“Prishtina po bëhet gjithnjë e më e njohur në botë. Festivale, koncerte, panaire dhe konferenca të ndryshme e vendosin qytetin tonë në hartën globale. Ky është vetëm fillimi i një rrugëtimi që do ta çojë Prishtinën më lart”, deklaroi Rama.
Ai shtoi se nuk lejon që pengesat të ndalojnë realizimin e projekteve të mëdha, duke i kthyer sfidat në mundësi për të përparuar.
“Unë jam kryetar i projekteve të mëdha, i fokusuar te vizioni dhe transformimi i qytetit. Çdo pengesë është një hap drejt suksesit. Synimi im është ta ndryshojmë mendësinë dhe të ndërtojmë një Prishtinë me vizion, me dije dhe me dashuri për qytetarët”, tha Rama.
Gjatë fjalimit të tij, kryetari theksoi se zhvillimi i kryeqytetit nuk është thjesht për një grup të vogël, por për të gjithë qytetarët. /teve1.info/
