Komisioni Qendror i Zgjedhjeve (KQZ) ka njoftuar se procesi i numërimit të votave ka përfunduar në 27 komuna të Kosovës, ndërsa në 11 komuna të tjera do të vazhdojë më 1 janar 2026.
Komunat që deri më tani kanë përmbyllur plotësisht numërimin e votave janë: Mamusha, Shtërpca, Juniku, Hani i Elezit, Kllokoti, Parteshi, Mitrovica e Veriut, Novobërda, Zveçani, Viti, Zubin Potoku, Ranillugu, Dragashi, Istogu, Obiliqi, Gllogoci, Deçani, Shtimja, Klina, Kamenica, Fushë Kosova, Leposaviqi, Graçanica, Vushtrria, Rahoveci, Skënderaj dhe Kaçaniku.
Sipas KQZ-së, procesi i numërimit do të rifillojë të martën, më 1 janar 2026, në orën 16:00, në Qendrat Komunale të Numërimit (QKN) në komunat: Prishtinë, Pejë, Prizren, Podujevë, Mitrovicë e Jugut, Gjakovë, Malishevë, Lipjan, Gjilan, Ferizaj dhe Suharekë.
Deri më tani, sipas të dhënave zyrtare janë procesuar mbi 1 mijë e 900 nga gjithsej 2 mijë e 557 vendvotime, apo më shumë se 74 për qind e tyre.
KQZ bën të ditur se pas përfundimit të numërimit të çdo vendvotimi, të dhënat transmetohen në platformën zyrtare për publikimin e rezultateve zgjedhore.
Ndërkohë, sot në mesditë, pas përfundimit të procedimit të kutive të hapura, procesi i numërimit është ndërprerë përkohësisht dhe do të rifillojë më 1 janar në orën 16:00./teve1.info/
