Me emocione, certifikata dhe dëshirë për t’u rikthyer vitin e ardhshëm, është përmbyllur edicioni i 26-të i Universitetit Veror Ndërkombëtar të Prishtinës (PISU).
Ceremonia përmbyllëse u zhvillua në oborrin e Rektoratit të Universitetit të Prishtinës, ku morën pjesë profesorë ndërkombëtarë, profesorë të UP-së dhe studentë vendas e ndërkombëtarë.
Rektori i Universitetit të Prishtinës, prof. Arben Hajrullahu, falënderoi profesorët dhe studentët për kontributin e tyre në organizimin e këtij aktiviteti, duke theksuar rëndësinë e bashkëpunimit akademik ndërkombëtar.
Në emër të profesorëve ndërkombëtarë foli prof. Alain Riveros-Rivera nga Pontificia Universidad Javeriana në Kolumbi, i cili e vlerësoi Universitetin Veror si një hapësirë të ndërtuar mbi kureshtjen, dialogun dhe bashkëpunimin mes studentëve dhe profesorëve.
Ndërsa profesoresha e Fakultetit të Ekonomisë në UP, Mjellma Carabregu-Vokshi, e cilësoi Universitetin Veror si më shumë se një program akademik, duke theksuar rolin e studentëve në suksesin e tij.
Gjatë ceremonisë u ndanë certifikata për profesorët ndërkombëtarë dhe profesorët e UP-së që kontribuuan në këtë edicion.
Në Universitetin Veror Ndërkombëtar të Prishtinës këtë vit morën pjesë rreth 350 studentë vendas dhe ndërkombëtarë. Në kuadër të programit u zhvilluan 19 kurse të bashkëdrejtuara nga profesorë ndërkombëtarë dhe profesorë të UP-së, si dhe 12 punëtori që trajtuan tema të ndryshme, përfshirë inteligjencën artificiale, teknologjinë financiare, antropologjinë, mjekësinë e gjumit dhe shkencat forenzike.
Pjesë e edicionit ishin edhe aktivitete kulturore, diskutime për demokracinë dhe të drejtat e grave, festivali i filmit të shkurtër UPWard, aktivitete sportive dhe vizita në vende historike e kulturore të Kosovës.
Universiteti Veror Ndërkombëtar i Prishtinës vazhdon të mbetet një nga platformat kryesore për ndërkombëtarizimin e Universitetit të Prishtinës dhe promovimin e Kosovës në arenën akademike ndërkombëtare./teve1.info/
