E dëmtuara Elvedina Hajdari erdhi në këtë gjykatore për herë të fundit të mërkurën.
Meqë mesin e kësaj jave gjyqi i Hajdarit, ku për mospërfillje të urdhrit të gjykatës akuzohet vëllau i ish-bashkëshortit të saj përfundoi.
Kështu në seancën e mbyllur për media, u thanë fjalët përfundimtare nga palët.
E pasi përfundoi seanca, për media Hajdari tregoi se kishte kërkuar nga gjyqtari i Gjykatës Themelore në Drenas, dënim maksimal për të akuzuarin.
Se fajësia e të akuzuarit është vërtetuar përgjatë procesit, e tha edhe mbrojtësi i Hajdarit.
Edhe prokurori i çështjes kërkoi nga Gjykata që të shpall fajtor të pandehurin A.H.
Ndërkohë, rastin në tërësi e quajti si trillim mbrojtja e të akuzuarit.
Madje, ai pretendoi se prokuroria ishte nën presionin e mediave dhe organizatave joqeveritare përgjatë procesit gjyqësor.
Këto pretendime i mohoi Kolektivi Feminist, derisa kërkuan drejtësi për Elvedina Hajdarin.
I akuzuari, së bashku me ish bashkëshortin e Elvedina Hajdarit dhe babën e tij, ishin urdhëruar nga Gjykata që mos t’i afrohen Hajdarit, urdhër ky i lëshuar pas raportimit të dhunës në familje, e që nuk ishte zbatuar.
Kronika e gazetares Florijeta Dernjani.
