Sot, pritet të mbahet takimi i pestë ndërmjet kryeministrit Albin Kurti dhe kryetarit të LDK-së, Lumir Abdixhiku, në përpjekje për të arritur një marrëveshje për zgjedhjen e presidentit të ri, pak ditë para skadimit të afatit kushtetues më 28 prill.
Takimi, i cili do të zhvillohet në ambientet e Kuvendit duke filluar nga ora 11:00, vjen pas thirrjeve të ushtrueses së detyrës së presidentes, Albulena Haxhiu, për intensifikim të përpjekjeve dhe arritje të një kompromisi brenda kësaj jave që ajo e ka cilësuar si vendimtare.
Haxhiu ka theksuar se koha në dispozicion është e kufizuar, por sipas saj, nëse ekziston vullnet politik, marrëveshja mund të arrihet shpejt.
Nga ana tjetër, përfaqësues të Lëvizjes Vetëvendosje kanë deklaruar se janë të gatshëm për kompromis dhe presin që në ditët në vijim të ketë propozime konkrete për emrin e presidentit. Deputeti Arbër Rexhaj ka bërë të ditur se nuk sheh pengesa nga subjekti i tij për përmbylljen e këtij procesi.
Nëse Kuvendi nuk arrin ta zgjedhë presidentin deri më 28 prill, vendi do të shkojë automatikisht në zgjedhje të reja parlamentare, të cilat duhet të mbahen brenda 45 ditëve. /teve1.info/
