Ministri në detyrë i Bujqësisë, Faton Peci, pas dështimit të konstituimit të Kuvendit në seancën e parë pas Aktgjykimit të Gjykatës Kushtetuese ka thënë se është e qartë se emri i Albulena Haxhiut nuk është problem për opozitën.
Ai tha se pas dështimit të kandidaturës së ministres në detyrë, Albulena Haxhiut e ministres në detyrë së Punëve të Jashtme, Donika Gërvalla – LVV-ja i ka edhe katër emra të tjerë që do të paraqiten si kandidat potencial për kryetar të Kuvendit.
“Në rast se i kemi edhe emrat e tjerë, maksimalisht numri i emrave në kuptimin me u paraqit si kandidat potencial për kryetar të Kuvendit mund të jenë edhe katër, për shkak se janë kandiduar vetëm nga njëherë, kjo nuk nënkupton që s’mundet me u përsërit prapë çështja e kandidimit. Por, deri në këtë fazë ne nuk kemi një vendim të tillë do të ulemi në ditët në vijim dhe do të përcaktohemi se cili mund të jetë emri i radhës që ne do të bëjmë përpjekje”, tha ai para gazetarëve.
Ai tha se emrat nuk i kanë, por qëndron vetëm si opsion.
“Emrat nuk i kemi sot ata potencialisht mund të jenë në seancat e radhës deri në këtë fazë. I përmenda katër, për faktin se secili ka të drejtë deri në tri herë me u paraqit në një seancë. Nuk i kemi me emra, e pata vetëm si opsion”, deklaroi ai./teve1.info/
