Kryetari i PDK-së, Memli Krasniqi ka zhvilluar një takim me ambasadorin e ShBA-së në Kosovë, Jeffrey Hovenier.
Ai ka shkruar se në këtë takim ia ka shprehur rezervat lidhur me propozimin evropian përkundër thirrjes së amerikanëve që të ketë unitet për këtë plan.
“Ambasadorit Hovenier i shpreha edhe një herë qëndrimin e PDK-së në lidhje me dialogun Kosovë – Serbi dhe rezervat tona në raport me propozimin evropian tashmë të pranuar nga Kryeministri Kurti. Për ne, kjo marrëveshje është e pamjaftueshme dhe një mundësi e humbur për të arritur një marrëveshje finale, gjithëpërfshirëse dhe me njohjen e ndërsjellë në qendër”, ka shkruar Krasniqi.
Tutje Krasniqi ka shkruar se Kurti ka dështuar që të arrijë përmbushjen e qëllimeve shtetërore të Kosovës në dialog.
“Përkundër mbështetjes që PDK i ka dhënë Kryeministrit Kurti për dy vjet me radhë në procesin e dialogut dhe në raport me Serbinë, përmes gabimeve e veprimeve kryeneqe dhe në shpërputhje me kontekstin politik, ai ka dështuar që të arrijë përmbushjen e qëllimeve shtetërore të Republikës së Kosovës”, ka shkruar Krasniqi.
